డబుల్ బెడ్ రూమ్ ఇప్పిస్తామంటూ వసూల్.

ఘరానా మోసగాళ్లు అరెస్టు

1
TMedia (Telugu News) :

డబుల్ బెడ్ రూమ్ ఇప్పిస్తామంటూ వసూల్

– ఘరానా మోసగాళ్లు అరెస్టు

టీ మీడియా ,అక్టోబర్ 3 , హైదరాబాద్ : డబుల్ బెడ్ రూమ్ ఇళ్లు ఇప్పిస్తామంటూ ఓ ముఠా ఘరానా మోసానికి పాల్పడింది. బస్తీల్లో నివసించే పేద ప్రజలే లక్ష్యంగా మోసానికి పాల్పడిన ఈ ముఠా వారి వద్ద నుంచి దాదాపు కోటి రూపాయలు వసూలు చేసింది. బాధితుల ఫిర్యాదు మేరకు హైదరాబాద్ పోలీసులు ఇద్దరు నిందితులను అదుపులోకి తీసుకున్నారు. సరూర్ నగర్ పోలీసులు ముఠా వివరాలను వెల్లడించారు.మియాపూర్ న్యూ హఫీజ్‌పేట ప్రేమ్ నగర్‌కు చెందిన బాలరాజు లక్డీకపూల్‌లోని ఏజీ ఆఫీస్‌లో రికార్డు అసిస్టెంట్‌గా ఉద్యోగం చేస్తున్నాడు. ఈజీ మనీకి కక్కుర్తి పడిన బాలరాజు.. దగ్గరి బంధువుతో చేతులు కలిపి మాస్టర్ ప్లాన్ వేశాడు. బడంగ్ పేట వరలక్ష్ణీ నగర్‌లో ఉంటున్న తన బంధువు రాజు ఆటోడ్రైవర్‌గా జీవనం సాగిస్తుండగా.. అతడితో బాలరాజు చేతులు కలిపాడు. అందుకు ప్రధాన మంత్రి ఆవాస్ యోజన ను మార్గంగా ఎంచుకున్నాడు. పీఎంఏవై పథకం కింద ఉచితంగా ఇళ్లు మంజూరు చేయిస్తామంటూ ఈ ఇద్దరూ కలిసి 2016లో 50 మంది పేదల నుంచి సుమారు రూ.25లక్షలు వసూలు చేశారు. ఎంతకాలానికి ఇళ్లు మంజూరు చేయించకపోవడంతో డబ్బులు చెల్లించిన వారు ఒత్తిడి తెచ్చారు.

Also Read : కాళేశ్వరం లో తెలంగాణ ఆర్టిసి ఎండి పూజలు

దీంతో రూ.20 లక్షలు వారికి తిరిగి చెల్లించారు.కొన్నాళ్లు స్తబ్దుగా ఉన్న వీరికి ఆనంద కిశోర్ అనే వ్యక్తి పరిచయమయ్యాడు. ఈ ముగ్గురూ కలిసి మరో ప్లాన్ రెడీ చేశారు. బాలరాజు కేంద్ర ప్రభుత్వ ఉద్యోగిగా, ఆనందకిషోర్‌ హౌసింగ్‌ సొసైటీ ఉద్యోగిగా అవతారమెత్తారు. తెలంగాణ ప్రభుత్వం మంజూరు చేస్తున్న డబుల్‌ బెడ్‌ రూమ్‌ ఇళ్లు ఇప్పిస్తామని సరూర్‌నగర్‌, మీర్‌పేట, బడంగ్‌పేట, మెహిదీపట్నం తదితర ప్రాంతాల్లోని బస్తీల్లో ఉంటున్న పేదల నుంచి భారీగా డబ్బులు వసూలు చేశారు. తమకున్న పలుకుబడితో ఇళ్లు మంజూరు చేయిస్తామని నమ్మబలుకుతూ ఆటోడ్రైవర్‌ రాజు పేదల నుంచి నగదు వసూలు మొదలుపెట్టారు.

మూడు ఇండిపెండెంట్‌ ఇళ్లను మంజూరు చేయిస్తామని సరూర్‌ నగర్‌లో నివసించే పుట్ట శివలక్ష్మి వద్ద 2017లో రూ.5 లక్షలు వసూలు చేశారు. ఏళ్లు గడుస్తున్నా ఇళ్లు రాకకపోవడంతో శివలక్ష్మి సరూర్‌నగర్‌ పోలీసులను ఆశ్రయించారు. బాధితురాలి ఫిర్యాదు మేరకు రంగంలోకి దిగిన పోలీసులు బాలరాజు, రాజులను అదుపులోకి తీసుకున్నారు. వారిని విచారించగా ఇప్పటి వరకు తాము 100 నుంచి 120 మందిని మోసం చేశామని వారి వద్ద నుంచి రూ.కోటి వరకు వసూలు చేసినట్లు ఒప్పుకున్నారు. మరో నిందితుడు ఆనంద్‌ కిషోర్‌ పరారీలో ఉన్నట్లు పోలీసులు వెల్లడించారు.

for telugu news live alerts like, follow and subscribe TMedia on FacebookTwitterYouTube