పల్నాడు వాటర్గ్రిడ్ పనులు తక్షణమే నిలిపివేయాలి!
కేంద్ర జలశక్తి శాఖకు తెలంగాణ ప్రభుత్వం లేఖ
టీమీడియా , నవంబర్ 19, హైదరాబాద్ బ్యూరో : నాగార్జునసాగర్ జలాశయం సమీపంలో ఆంధ్రప్రదేశ్ ప్రభుత్వం చేపడుతున్న పల్నాడు వాటర్గ్రిడ్ ప్రాజెక్టుపై తెలంగాణ ప్రభుత్వం తీవ్ర అభ్యంతరం వ్యక్తం చేసింది. విభజన చట్ట నిబంధనలను ఉల్లంఘిస్తూ ప్రాజెక్టు పనులు చేపడుతున్నారని పేర్కొంటూ వాటిని తక్షణమే నిలిపివేయాలని కేంద్ర జలశక్తి శాఖను కోరింది. ఈ మేరకు రాష్ట్ర నీటిపారుదల శాఖ ముఖ్య కార్యదర్శి శ్రీధర్ కేంద్ర జలశక్తి శాఖ కార్యదర్శికి లేఖ రాశారు. కృష్ణా నదీ యాజమాన్య బోర్డు (కేఆర్ఎంబీ) ఛైర్మన్కు కూడా ఇదే అంశంపై లేఖ పంపించారు.
జలాశయ భద్రతపై ఆందోళన
పల్నాడు వాటర్గ్రిడ్ ప్రాజెక్టు కోసం 150.45, 160, 170 మీటర్ల స్థాయిల్లో ఓపెనింగ్స్ ఏర్పాటు చేయాలని ఏపీ ప్రతిపాదించినట్లు తెలంగాణ ప్రభుత్వం పేర్కొంది. నాగార్జునసాగర్ జలాశయం డెడ్ స్టోరేజ్ స్థాయి 155.48 మీటర్లు కాగా, అంతకంటే దిగువన 150.45 మీటర్ల వద్ద ఇన్టేక్ వెల్ ఏర్పాటు చేయడంపై అభ్యంతరం తెలిపింది. ఈ నిర్మాణం వల్ల జలాశయ భద్రత, నీటి నియంత్రణ, నిర్వహణతోపాటు ఇప్పటికే ఉన్న నీటి కేటాయింపులపై ప్రభావం పడే ప్రమాదం ఉందని ఆందోళన వ్యక్తం చేసింది.
అనుమతులు లేకుండా అదనపు నీటి తరలింపా?
ప్రాజెక్టులో భాగంగా ఇన్టేక్ వెల్స్, నీటి శుద్ధి కేంద్రాలు, జలాశయాలు, పైప్లైన్లు, ఓవర్హెడ్ ట్యాంకుల నిర్మాణ పనులు వివిధ దశల్లో కొనసాగుతున్నాయని తెలంగాణ ప్రభుత్వం తెలిపింది. ప్రస్తుతం నాగార్జునసాగర్ కుడి కాలువ ద్వారా తాగునీటి అవసరాల కోసం ఏపీ ఏటా 2.84 టీఎంసీల నీటిని తరలిస్తోందని పేర్కొంది. అదనపు నీటిని వినియోగించుకోవాలంటే కృష్ణా బోర్డు, అపెక్స్ కౌన్సిల్ అనుమతులు తప్పనిసరిగా తీసుకోవాలని స్పష్టం చేసింది. ఈ అనుమతుల ప్రక్రియ పూర్తయ్యే వరకు పనులు నిలిపివేయాలని, నీటి తరలింపును అడ్డుకోవాలని కేంద్రాన్ని కోరింది.
నీటి హక్కుల కోసం రాజీలేని పోరాటం
తెలంగాణకు కేటాయించిన కృష్ణా జలాల్లో ఒక్క చుక్క నీటిని కూడా వదులుకునే ప్రసక్తి లేదని రాష్ట్ర నీటిపారుదల శాఖ మంత్రి ఉత్తమ్కుమార్రెడ్డి స్పష్టం చేశారు. రాష్ట్ర నీటి హక్కులను కాపాడేందుకు రాజీలేని పోరాటం చేస్తామని, అవసరమైతే ఎలాంటి త్యాగానికైనా సిద్ధమని ప్రకటించారు. నాగార్జునసాగర్ నుంచి 1.8 టీఎంసీల నీటిని తరలించేందుకు ఏపీ చేసిన ప్రతిపాదనపై ఇప్పటికే అభ్యంతరాలు వ్యక్తం చేసినట్లు తెలిపారు.
కృష్ణా జలాల వినియోగంపై రాజకీయ విమర్శలు
గత పదేళ్ల బీఆర్ఎస్ పాలనలో నీటిపారుదల రంగంపై రూ.1.83 లక్షల కోట్లు ఖర్చు చేసినప్పటికీ కృష్ణా బేసిన్లో ఒక్క ప్రాజెక్టును కూడా పూర్తి చేయలేకపోయారని మంత్రి విమర్శించారు. కృష్ణా నదీ జలాల వినియోగంపై బీఆర్ఎస్ ప్రజలను తప్పుదోవ పట్టిస్తోందని ఆరోపించారు.
తెలంగాణ వినియోగం 122.74 టీఎంసీలు
బీఆర్ఎస్ హయాంలోని పదేళ్లలో ఆంధ్రప్రదేశ్ కృష్ణా నది నుంచి 4,460 టీఎంసీల నీటిని వినియోగించుకోగా, తెలంగాణ 1,993 టీఎంసీలు మాత్రమే వినియోగించుకుందని మంత్రి పేర్కొన్నారు.
ప్రస్తుత జల సంవత్సరంలో అక్టోబర్ 30 నాటికి ఏపీ 98.16 టీఎంసీల నీటిని వినియోగించుకోగా, తెలంగాణ 122.74 టీఎంసీలు వినియోగించుకుందని వెల్లడించారు. తెలంగాణ నీటి భద్రతకు ముప్పు కలిగించే ప్రాజెక్టులను వ్యతిరేకిస్తామని స్పష్టం చేశారు.






