“భారత్ సరికొత్త ఆట ఆడుతోంది!”
జి టి ఏ -6 థీమ్తో యూపీఏ పాలనపై
ప్రధాని మోదీ సెటైర్లు
టీమీడియా , నవంబర్ 19, ఢిల్లీ బ్యూరో : ప్రముఖ వీడియో గేమ్ గ్రాండ్ తెఫ్ట్ ఆటో (జి టి ఏ- 6) ట్రెండ్ను ప్రధాని నరేంద్ర మోదీ వినూత్నంగా ఉపయోగించుకున్నారు. గత యూపీఏ ప్రభుత్వ పాలనలోని పరిస్థితులను, తమ ప్రభుత్వ హయాంలో వచ్చిన మార్పులతో పోలుస్తూ సోషల్ మీడియాలో ఆసక్తికర పోస్టు చేశారు. “భారత్ సరికొత్త ఆట ఆడుతోంది..!” అంటూ వ్యాఖ్యానించారు.
2013లో విడుదలైనజి టి ఏ -5, 2026లో విడుదలైన జి టి ఏ -6 మధ్య ఉన్న 13 ఏళ్ల కాలాన్ని ప్రాతిపదికగా తీసుకుని భారతదేశంలో చోటుచేసుకున్న మార్పులను వివరించారు. మే 2014లో మోదీ ప్రధానిగా బాధ్యతలు చేపట్టడానికి కొన్ని నెలల ముందు జి టి ఏ -5 విడుదల కావడం ఈ పోలికకు నేపథ్యంగా నిలిచింది.
మోదీ ప్రస్తావించిన కీలక మార్పులు:
- ఆర్థిక వ్యవస్థ: ఫ్రెజైల్ ఫైవ్ దేశాల జాబితా నుంచి ప్రపంచంలో వేగంగా అభివృద్ధి చెందుతున్న ప్రధాన ఆర్థిక వ్యవస్థగా భారత్ ఎదిగిందని పేర్కొన్నారు.
- పేదరికం: తీవ్ర పేదరికం 27 శాతం నుంచి 2.6 శాతానికి తగ్గిందని తెలిపారు.
- పారిశుద్ధ్యం: పారిశుద్ధ్య కార్యక్రమాల పరిధి 39 శాతం నుంచి 100 శాతానికి చేరిందని వెల్లడించారు.
- సౌర విద్యుత్: సౌర విద్యుత్ సామర్థ్యం 2.82 గిగావాట్ల నుంచి 175 గిగావాట్లకు పెరిగిందని పేర్కొన్నారు.
- అంతరిక్ష రంగం: స్పేస్ స్టార్టప్ల సంఖ్య ఒకటి నుంచి 440కు పెరిగిందని తెలిపారు.
- రైల్వేలు: రైల్వే విద్యుదీకరణ 20 శాతం నుంచి 99.6 శాతానికి చేరిందని వివరించారు.
- ఇంటర్నెట్: ఒక జీబీ డేటా ధర రూ.308 నుంచి రూ.7.51కు తగ్గిందని పేర్కొన్నారు.
- రక్షణ రంగం: రక్షణ ఉత్పత్తుల ఎగుమతులు 80కి పైగా దేశాలకు విస్తరించాయని తెలిపారు.
- నక్సలిజం: నక్సల్స్ ప్రభావిత జిల్లాలు 182 నుంచి సున్నాకు తగ్గినట్లు పోస్టులో ప్రస్తావించారు.
జి టి ఏ -6 గేమ్ విడుదల సందర్భంగా రూపొందించిన ఈ ప్రత్యేక గ్రాఫిక్స్ ద్వారా గత 13 ఏళ్లలో దేశంలో ఆర్థిక, సాంకేతిక, మౌలిక సదుపాయాలు, రక్షణ రంగాల్లో సాధించిన పురోగతిని ప్రధాని ప్రజల ముందుంచారు. అయితే పోస్టులో పేర్కొన్న గణాంకాలు ఆయా రంగాలకు సంబంధించిన ప్రభుత్వ ప్రస్తావనలుగా చూడాలి. వాటి ఆధారాలు, లెక్కింపు విధానాలు, పోలికకు తీసుకున్న కాలపరిమితిని విడిగా పరిశీలించాల్సి ఉంటుంది.





